15 மணி நேரத்தில் 38 லட்சம் பேரால் பார்க்கப்பட்ட ‘விவேகம்’ டீசர்

சிவா இயக்கத்தில் அஜித் நடித்து வரும் படம் ‘விவேகம்’. சத்யஜோதி பிலிம்ஸ் தயாரிக்கும் இந்த படத்தில் காஜல் அகர்வால், அக்‌ஷராஹாசன், இந்தி நடிகர் விவேக் ஓபராய் உள்பட பலர் நடிக்கிறார்கள்.

அஜித் ரசிகர்களிடம் பெரும் எதிர்பார்ப்பை ஏற்படுத்தி உள்ள இந்த படத்தின் முதல் பார்வை போஸ்டரும், படத்தின் பெயரும் பிப்ரவரி 2-ந்தேதி வெளியிடப்பட்டது.

அஜித் ‘சிக்ஸ்பேக்‘ உடலுடன் நிற்பது, உடற்பயிற்சி செய்வது, பனிமலையில் எந்திர துப்பாக்கியால் சுடுவது, பெரிய மரக்கட்டையை தூக்கி வருவது போன்ற பல்வேறு தோற்றங்களில் போஸ்டர்கள் வெளியாகின.

இதற்கு ரசிகர்களிடம் பெரும் வரவேற்பு இருந்தது. ‘விவேகம்‘ படத்தின் பெரும்பாலான படப்பிடிப்பு வெளிநாட்டில் நடந்தது. இறுதி கட்ட படப்பிடிப்பு ஹங்கேரி நாட்டில் நடந்து வருகிறது.

இயற்கை எழில்மிகுந்த பகுதிகளில் படப்பிடிப்பு நடக்கிறது. விரைவில் படப்பிடிப்பு நிறைவடையும் என்று எதிர்பார்க்கப்படுகிறது.

இந்த நிலயில் ‘விவேகம்‘ படத்தின் டீசர் அஜித் பிறந்த நாளான மே 1-ந்தேதி வெளியாகும் என்று எதிர்பார்க்கப்பட்டது. அப்போது வெளியாகவில்லை. பின்னர் 18-ந்தேதி வெளியாகும் என்று அறிவிக்கப்பட்டது. அடுத்து 11-ந்தேதி டீசர் வெளியாகும் என்று அதிகாரப்பூர்வ அறிவிப்பு வெளியானது.

இதன்படி நேற்று நள்ளிரவு 12.01 மணிக்கு விவேகம் டீசர் வரும் என்று ரசிகர்கள் காத்து இருந்தனர். ஆனால் ஒரு மணி நேரத்துக்கு முன்பாகவே இரவு 11 மணிக்கு விவேகம் டீசர் யுடியூப்பில் வெளியாகி அஜித் ரசிகர்களுக்கு இன்ப அதிர்ச்சியை அளித்தது.

57 நொடிகள் ஓடும் இந்த டீசரில் முதலில் உலக பட பின்னணியில் வரும் அஜித் இரண்டு கைகளிலும் துப்பாக்கியுடன் வந்து சுடுகிறார். தொடர்ந்து வனப்பகுதியில் ராணுவத்தினர் துப்பாக்கியால் சுட்டுக் கொண்டே ஓடுகிறார்கள். பின்னர் பிரமாண்ட ஓட்டல், நகரம், வீதி என்று கேமரா சுழல்கிறது.

அஜித் பல்வேறு தோற்றங்களில் வருகிறார். ஒரு மோட்டார் சைக்கிளில் அவர் வருவதுடன் டீசர் முடிவடைகிறது. அப்போது “நீயே நினைக்கிற வரை எவனாலும்.. எப்பவும் உன்னை ஜெயிக்க முடியாது” என்ற வசனம் பின்னணியில் ஒலிக்கிறது.

இந்த டீசரில் இடம் பெற்றுள்ள காட்சிகள் ஒருசில நொடிகள்தான் வருகின்றன. என்றாலும், பிரமாண்டமாக படமாக்கப்பட்டுள்ளது. விமானங்கள், பனி மலை காட்சிகள் பிரமிக்க வைக்கின்றன.

இந்த டீசர் வெளியானது அஜித் ரசிகர்களை உற்சாகம் அடைய வைத்துள்ளது. 15 மணி நேரத்தில் இந்த டீசரை 38 லட்சத்து 23 ஆயிரம் பேர் இணைய தளத்தில் பார்த்துள்ளனர். நேரம் ஆக ஆக பார்வையாளர்களின் எண்ணிக்கை ஆயிரக்கணக்கில் அதிகரித்துக் கொண்டிருக்கிறது.

Post your comment

TamilWire.NET - Latest English News

TamilTunes.com - Latest Songs Downloads

Tamil.Movie - Latest Tamil Movie Trailers to Watch Online

Tamil.Gallery - Latest Tamil Galleries